Konplo Fo Diplòm Enfimyè Abouti a Arestasyon de plis de yon Douzèn Akize

MIAMI - Plis de yon douzèn endividi akize nan Distri Sid la Florid pou swadizan patisipasyon yo nan yon konplo fwòd elektwonik ki kreye yon chemen dekoupe ilegal pou kandida enfimyè jwenn lisans ak travay.

Daprè twa akizasyon ofisyèl resan ki pa sele epi ki te emèt pa Jiri Tabli Federal Sid La Florid la, ak twa akizasyoon ke komisè gouvènman federal te depoze, tout akize yo te angaje nan yon konplo pou vann fo diplom enfimyè ansanm ak tout relve ke yo pran nan men lekòl enfimyè akredite yo ba endividi ki tap chache lisans ak travay antan ke enfimyè diplome (RNs) ak enfimyè kalifye/enfimyè vokasyonèl (LPN/VNs).

Fo diplòm yo ak relve yo kalifye tout achtè yo pou prezante devan egzamen leta a, epi aprè yo finn pase l, jwenn lisans ak travay nan divè leta antan ke RNs ak LPN/VNs.  Plan global konplo a te gen pou wè ak distribisyon de plis de 7600 fo diplòm enfimye ke tout lekòl enfimye ki chita nan Sid La Florid la te emèt:  Siena College nan Broward County, Fla., Palm Beach School of Nursing nan Palm Beach County, Fla., ak Sacred Heart International Institute nan Broward County.  Lekòl sa yo fèmen kounyeya.

Chak akize ap fè fas a 20 lane prizon.

Markenzy Lapointe, Pwokire Distri Sid La Florid la di: "Demann pou enfimyè wo anpil epi li kontinye ap grandi," "Se domaj ke sèten moun ansanm ak enstitisyon ki konekte ak metye enfimyè a eseye eskive tout egzijans edikasyonèl yo.  Biwo sa a ansanm ak patnè fòsdelòd li yo angaje l pou l pouswiv konplo fwòd sa yo ak tout lòt konplo pou komèt fwòd sanblab yo ki mete lavi piblik la an danje.

Tip zak kriminèl sa yo kontinye ap parèt, sitou nan zòn sa a.

"Fwòd Swen Sante pa anyen nouvo pou La Florid di Sid, piske anpil nan magouyè sa yo wè l kankou yon fason pou yo fè lajan fasil, byen ke ilegal, se sa "Ajan FBI Chad Yarbrough, ajan responsab kap mennen dosye a nan Miami" di.  "Sa ki pi enkyetan konsènan envestigassyon sa a se ke gen plis de 7600 moun atravè peyi a kap mache ak akreditasyon enfimye ki fo, ki pwobableman ap trete pasyan ki nan swen kritik.  Si se pat pou dilijans ak gwo travay di envestigatè yo sou dosye sa a, degre fwòd la patap janm dekouvri."

Akizasyon sa yo konsantre sou bi lisans pou enfimyè a, ki la pou pwoteje piblik la de donmaj lè w etabli yon minimòm de kalifikasyon ak konpetans.

"Swadizan lavant ak acha diplòm ak relve enfimyè yo ba endividi ki disponib men ki pa kalifye se yon krim ki gen potansyèl pou l mete an danje sante ak sekirite tout pasyan yo epi li denigre metye enfimyè a," se sa Ajan Espesyal Omar Pérez Aybar, responsab Depatman Sante ak Sèvis Sosyal la, Biwo Enspektè Jeneral (HHS-OIG), di.  "An kowòdinasyon ak tout patnè nan fòsdelòd nou yo, HHS-OIG ap kontinye envestige ak agresivite tout move aktè yo ki, kareman meprize byenèt lèzòt pou anrichi tèt yo ak fwòd."

Akizasyon ki gen Rapò ak Fo Diplòm Enfimyè ak Relve de Siena College.

U.S. v. Witherspoon, et al., dosye no.: 23-60005-Cr-Smith

U.S. v. Sanon, dosye no.: 23-60013-Cr-Moreno

Dokiman akizasyon ofisyèl yo dekri Siena College antan ke yon lekòl akredite pa Komisyon Anseyman Endepandan La Florid ak Konsèy Enfimyè La Florid nan Konte Broward la ki ofri yon Pwogram Enfimyè Oksilyè ansanm ak yon pwogram Enfimyè Diplome (RN) rive jis a yon diplòm inivèsitè nan Syans pou Enfimyè.  Se Eugene Sanon ki te manadjè Siena College.

Akizasyon ofisyèl la akize Stanton Witherspoon nan Konte Burlington N.J.: Alfred Sellu nan Konte Burlington N.J.; Rene Bernadel nan Konte Westchester, N.Y. de konplote pou komèt ak komèt fwòd elektwonik.  Akizasyon a pretann ke Witherspoon, Sellu ak Bernadel solisite ak rekrite endividi ki tap chache akreditasyon enfimyè pou jwenn anplwa antan ke RN oswa LPN/VN.  Yo pretann ke akize sa yo fè aranjman ak Sanon ki tap jere Siena College epi ki akize pa rekizitwa de konplo pou komèt fwòd elektwonik, pou kreye ak distribiye fo diplòm ak relve yo.  Yo afime ke aspiran RN ak LPN/VN yo te asiste Pwogram pou Enfimyè nan Siena College nan Konte Broward la epi ke yo konplete tout kou nesesè yo ansanm ak tout fòmasyon klinik yo pou yo te ka jwenn diplòm RN oswa LPN/VN yo.  Ofèt, aspiran a enfimyè yo pa janmè konplete ni tout kou nesesè yo ni fòmasyon klinik yo.

Rekizitwa kont Sanon a pretann ke li menm ansanm ak lòt vann milye fo diplòm Enfimyè de Siena College ansanm ak tout relve yo ba aplikan metye enfimyè yo ki itilize yo pou jwenn lisans RN oswa LPN/VN nan divè leta ak travay enfimyè ak tout pouvwayè swen sante yo san yo pat okouran atravè peyi a.

Akizasyon ki gen Rapò ak Fo Diplòm Enfimyè ak tout Relve yo de Palm Beach School of Nursing.

U.S. v. Russ, et al., dosye no.: 23-60007-Cr-Singhal

Daprè dokiman akizasyon ofisyèl yo, bi Palm Beach School of Nursing se te prepare elèev yo pou ranpli tout egzijans Lisans la Florid ak Konsèy Enfimyè yo, ak kalifye pou pran egzamen leta pou jwenn lisans la pou ka travay antan ke enfimye diplome.

Akizasyon ofisyèl la akize Gail Russ nan Konte Broward la; Cheryl Stanley nan Konte Collier, Fla.; Krystal Lopez nan Konte Palm Beach; Ricky Riley nan Konte Broward; Norberto Lopez nan Konte Palm Beach; Damian Lopez nan Konte Palm Beach; Francois Legagneur nan Konte Nassay, N.Y.; Reynoso Seide nan Konte Union, N.J.; Cassandre Jean nan Konte Palm Beach; Yelva Saint Preux nan Konte Suffolk, N.Y.; Evangeline Naissant nan Konte Nassau, N.Y.; Rony Michel nan Konte Monmouth, N.J.; Vilaire Duroseau nan Konte Essex, N.J.; ak Yvrose Thermitus, a/k/a "Yvrose Thompson," nan Konte Union, N.J., de konplote pou komèt, ak komèt fwòd elektwonik.  Rekizitwa a pretann ke akize sa yo solisite ak rekrite endividi ki tap chache akreditasyon enfimyè pou jwenn travay antan ke RN oswa LPN/VN.

Yo pretann ke akize rekritè sa yo fè aranjman ak mèt Palm Beach School of Nursing la, Johanah Napoleon ansanm ak tout anplwaye lekòl la Gail Russ, Cheryl Stanley, Krystal Lopez, ak Ricky Riley pou kreye ak distribiye fo diplòm fwodè ak relve yo ki afime ke aspiran RN ak LPN/VN te asiste Palm Beach School of Nursing e ke yo konplete tout kou nesesè yo ansanm ak fòmasyon klinik yo pou yo te ka jwenn diplòm RN oswa LPN/VN yo.  Ofèt, enfimyè aspiran yo pat janmè konplete ni kou nesesè yo ni fòmasyon klinik yo.

Aplikan pou pòs enfimyè yo itilize fo diplòm ansanm ak tout relve yo te achte yo de mèt ak anplwaye Palm Beach School of Nurssing la pou jwenn lisans RN oswa LPN/VN nan divè leta ak travay kom enfimyè ak pouvwayè swen sante san yo pat okouran atravè peyi a.

Napoleon te deja akize pa rekizitwa e li plede koupab de konplote pou komèt fwòd swen de sante ak fwòd elektwonik, ansanm ak fwòd elektwonik (dosye nimewo 22-60111-Cr-Smith ak 22-60118-Cr-Smith).

Akizasyon ki gen Rapò ak Fo Diplòm Enfimyè ak Relve de Sacred Heart International Institute

U.S. v Jean, et al., dosye no.: 23-60010-Cr-Smith

U.S. v. Etienne, dosye no.: 23-60012-Cr-Singhal

Daprè dokiman akizasyon ofisyèl yo, Sacred Heart International Institute se yon Lekòl akredite pa Konsèy Enfimye La Florid nan Konte Broward la ki te ofri yon pwogram enfimyè destine a prepare elèv yo pou anplwa antan ke enfimyè oksilyè otorize.

Akizasyon Ofisyèl la akize Ludnie Jean nan Konte Harris, Texas; Serge Jean Simoon Itaman nan Konte Harris, Texas; Anna Itaman nan Konte Harris; Rhomy Louis nan Konte Suffolk, N.Y.; ak Nadege Auguste nan Konte Broward la de konplote pou ak komèt fwòd elektwonik.  Yo pretann ke akize sa yo solisite ak rekrite endividi ki tap chache jwenn akreditasyon enfimyè pou jwenn travay antan ke LPN/VN.  Rekritè sa yo fè aranjman ak Charles Etienne, mèt Sacred Heart, pou kreye ak distribiye relve fo ak fwodè ki afime ke aspiran a te asiste Sacred Heart ak konplete tout kou nesesè yo ansanm ak fòmasyon klinik yo pou yo te ka jwenn diplom LPN/VN.  Ofèt, enfimyè aspiran yo pat janmè konplete tout kou nesesè yo ni fòmasyon klinik yo.  Etienne akize pa Rekizitwa ak konplo pou komèt fwòd elektwonik.

Tout kandida pou enfimyè yo itilize fo diplòm ak relve ke yo te achte de Sacred Heart pou jwenn lisans LPN/VN nan divè leta ak travay enfimyè ak pouvwayè swen de sante ki pat okouran atravè tout peyi a.

Anons la fèt pa Markenzie Lapointe, Pwokirè Distri Sid La Florid la; Ajan Espesyal Enterimè FBI Chad Yarbrough, Biwo Rejyonal Miami; ak Ajan Espesyal Responsab, Omar Perez Aybar, HHS-OIG.

Yon enkilpasyon se sèlman yon akizasyon, epi yon akize inosan jiskaske yo pwouve li koupab.

Se FBI Miami ansanm ak HHS-OIG Miami ki envestige tout dosye sa yo.  Depatman Envestigasyon Sekirite Nasyonal te bay asistans ki te itil anpil, Biwo Rejyonal Miami; Depatman Veterans Affairs-Office of Inspector General Dèzetazini; Depatman Enspeksyon Lapòs Dèzetazini, Miami; ansanm ak Pwokirè Jeneral La Florid Seksyon Kontwòl Fwòd nan Medicaid, Biwo Rejyonal Mid-Atlantic.  Adjwen Komisè Gouvènman Christopher J. Clark kap pouswiv dosye a ansanm ak Adjwen Komisè Gouvènman nicole Grosnoff kap jere tout konfiskasyon byen yo.  Dosye sa a ap pouswiv devan leta ansanm ak tout lòt dosye kriminèl ki gen rapò ak yo nan Distri Alès Maryland.

W ap jwenn tout dokiman jidisyè ki gen rapò ak enfòmasyon sou sit entènèt Tribinal Distri pou Distri Sid La Florid sou www.flsd.uscourts.gov oswa sou http://pacer.flsd.uscourts.gov.

###